Onghang tuo kito dah koba ae.. kok pandai bia boleh diikut dan kok bangang bia boleh diajar. Tak tau bertanyo jangan sosek jalan dan ukur baju kek badan sendighi. Maaf yo mintak laluan sobab atuk oghang tuo belaja tak tinggi mano tapi dah pueh makan garam perjuangan, dah kematu tumit kaki dan apotah lagi uban pun dah macam bunga lalang. Pas neghori kito bertuah dapek anak sulung Dun Paroi dan kebotolan ese pun oghang lamo kek sini, kok dapek biarlah dapek nompang menyambut anak sulong sesudah kek 50 tahun menunggu... kok oghang lain tak taula tapi ese menitih airmato bilo dapek beghito monang kek Paroi. Lamo daa... syukur kek Allah SWT dongan pemberian ini. Dapek juo monang sobolum kubur kata mari.
Yang ese tak pueh ati tu bilo susah sangat oghang Dun Paroi nak jumpo YB kito dan nak caghi pejabat ae pun tak mano tah... ado donga dah ado pusat masyarakat tapi beghapo ghamai yang dapek caghi pejabat tu? inilah yang ghamai oghang ateh pagar merungut dan bilo donga kek telingo ese... bukan kepalang sodih ae ati sobab dah ado cakap-cakap tak sodap nak donga. Kok ado YB kito melilau kek tompek-tompek tertentu tapi tak sumo dapek berkonaan dan mengadu masaelah. Agak ae nak pogang Paroi ni soponggal jo ko? ese tau YB dan bobudak Pas banyak kojo dan sosek napeh nak caghi duit ... tapi YB dan Pas perlu tunjuk muko sadin kek oghang luar supaya pengundi kito tau YB Pas Paroi itu WUJUD!!!
Cagho mudah ae.. pejabat tu eloklah kek kawasan mudah dikunjungi atau nampak kek oghang. Mano talian paneh (hotline) YB? ni dah kek lobih setahun monang tapi suara gatal masih ado menafikan kewujudan YB kito. Kona fahamlah.. awak oghang baghu anak sulong dan jadi harapan sumo... pengundi kito kek Paroi bukan lain-lain tompek.. banyak kojo nak tunjuk kecomelan anak sulong.. cantik ko huduh ko... kok tak boduit pun jangan tunjuk pokai sangat tapi bukak pintu dan telefon untuk dokekkan pengundi kito.
Tolonglah donga cakap oghang!
